Mánudagur, 1. sept. 2003 Bókin Skattur á fyrirtæki skiptist í þrjá þætti. Fjallar fyrsti þáttur um hugtakið atvinnurekstur, hvaða tekjur tilheyra honum og hvenær, það er, á hvaða ári atvinnurekanda telst hafa hlotnast þær. Í öðrum þætti ræðir svo um frádrátt frá þessum tekjum, og skiptir þar auðvitað mestu máli hinn almenni rekstrarkostnaður, þar á meðal afmörkun hans gagnvart útgjöldum, sem ekki má draga frá tekjum, eins og einkakostnaði og fjármunakostnaði. Bókinni lýkur svo á ítarlegri greinargerð um skattlagningu einstakra fyrirtækjaforma, svo sem hlutafélaga, sameignarfélaga og einstaklingsfyrirtækja, og skattfrjálsa umbreytingu þeirra úr einu rekstrarformi í annað. Höfundur bókarinnar Skattur á fyrirtæki er Ásmundur G. Vilhjálmsson héraðsdómslögmaður og forstöðumaður skattasviðs endurskoðunarfyrirtækisins Grant Thornton, en þekkingarfélagið SkattVís, samlagsfélag, gefur bókina út. Bókin Skattur á fyrirtæki kostar 9.700 kr. og má panta hana á netfanginu agv@skattvis.is.