Bóndi Sigurður er búinn að vera bóndi á Grund í 40 ár, en nú er komið að því að hætta og flytjast á mölina. Síðustu ár hefur búskapurinn gengið hálfbrösuglega, þar sem tap hefur verið á honum. Af tilboði í jörðina að dæma sýnist Sigga, að hagnaður af sölu eigna, það er véla og tækja, útihúsa og þess háttar, muni nokkurn veginn jafnast út á móti tapinu. Öðru máli gegnir hins vegar um 100 þúsund lítra mjólkurkvótann, sem boðið hefur verið í hvorki meira né minna en 25 millj. Af honum sýnist Sigurði hann þurfi að greiða um 10 millj. í tekjuskatt, og verði því lítið sem ekkert eftir til að kaupa sér íbúð fyrir á mölinni. Er hugsanlegt, að Sigurður geti fengið frest á þessari skattlagningu eða jafnvel sloppið algerlega við hana, og ef svo er, hvað þarf hann þá að gera, til þess að svo megi verða? Svar við þessari getraun skal senda á netfangið agv@skattvis.is fyrir 1. nóv. 2003 og fær sá, sem fyrstur kemur með rétt svar, í verðlaun, bókina Skattur á fjármagnstekjur og eignir.